Kiny
Eng
Fr
Ubumuntu Arts Festival 2025: ubuhanzi buhanze ijisho ubuzima bwo mu mutwe
Uwajeneza Donatha
Jul 10, 2025 - 18:13
Mu rwego rwo guhangana n’ibibazo byo mu mutwe byugarije abakora ubuhanzi, Ubumuntu Arts Festival 2025 igiye guhuriza hamwe ababukora bo mu ngeri zitandukanye, abanyapolitike, n’abandi mpuzamahanga baturutse mu bihugu 30 byo hirya no hino ku isi, kuva ku italiki 14- 20 Nyakanga (07)2025, i Kigali.
kwamamaza
Iri serukiramuco rifite intego yo guhuriza hamwe abantu b’ingeri zitandukanye binyuze mu buhanzi, ibiganiro n’imyidagaduro igamije gukiza ibikomere, kwibuka amateka no gusigasira ubumuntu.
Mu myaka icumi rimaze rishinzwe na Hope Azeda; umwanditsi w’ikinamico akaba n’umunyapfura wiyemeje kubaka amahoro, Ubumuntu Arts Festival ryahindutse urubuga rukomeye ku mugabane wa Afurika rihuza abahanzi batanga ibitekerezo byubaka, binyuze mu mico n’ubuhanzi bufite ubutumwa.
Insanganyamatsiko y’uyu mwaka igira iti “Overcoming: Dare to Dream”, ishingiye ku bitekerezo ko ubuhanzi bufite ubushobozi bwo kuvura ibikomere, gutinyura abantu kongera kugira icyizera cy'ejo hazaza no kubahumuriza mu rugendo rwo kwiyubaka. Ni muri urwo rwego iserukiramuco rizaha umwihariko ikibazo cy’ubuzima bwo mu mutwe, cyane cyane ku bahanzi n’abandi bafite imirimo ikenera guhanga no gukorana n’amarangamutima.
Umunsi wa mbere w’iri serukiramuco, hateganyijwe igikorwa cyiswe "Mental Health Day", umunsi wihariye wo kungurana ibitekerezo no gutanga ibisubizo ku mbogamizi z’ubuzima bwo mu mutwe.
Kuri uyu munsi, hazabaho ibiganiro, amahugurwa, imikino mbarankuru n’ibikorwa byifashisha ubuhanzi mu gutanga ubufasha, kurwanya ipfunwe no kongerera abantu ubushobozi bwo kuvuga ibyo bahura nabyo. Iki gikorwa kikazatanga urubuga rwo gusangiza ubuhamya no kwiyakira, mu murongo wo gushyira imbere gukira no kwiyubaka.
Mu bindi bikorwa by’ingenzi biteganyijwe muri iri serukiramuco ry'uyu mwaka, harimo igikorwa cyiswe "Memory Caravan" aho imiryango yarokotse Jenoside yakorewe Abatutsi mu 1994 izasurwa; icya "Cultural Diplomacy Unconference" izahuza abahanzi, abadipolomate n’abayobozi mu biganiro byimbitse.
Hari kandi igitaramo cyiswe "Music is Humanity & Ikaze Night" kizahuza abahanzi mpuzamahanga mu muziki uhuza abantu; ndetse n’ibitaramo bya Ubumuntu Classic, bizabera ku Rwibutso rwa Jenoside ku Gisozi n’ahandi hateguwe, ibyo byose bikazagaragaza ubuhanzi bwibanda ku kwibuka, kubaka icyizere n'amahoro arambye.
kwamamaza