Kiny
Eng
Fr
RDC: Miliyoni 25 bugarijwe n'inzara ikabije bitewe n’ibibazo by'umutekano
Uwajeneza Donatha
Nov 6, 2025 - 11:56
Raporo nshya ya IPC yagaragaje ko ibibazo by'imirwano n’umutekano muke mu Burasirazuba bwa RDC byashyize hafi miliyoni 25 mu nzara ikabije, harimo miliyoni 3.2 zigeze ku rwego rw’ubutabazi bwihutirwa.
kwamamaza
Iyi raporo mpuzamahanga yasohotse ku wa 4 Ugushyingo (11) 2025, igaragaza ko abanye-Congo bagera kuri miliyoni 25 bari mu nzara ikaze cyangwa mu rwego rwatakaje ibyiringiro byo kubona ibiribwa bihagije. Ni ikibazo gikabije cyane mu ntara zo mu Burasirazuba zirangwamo imirwano idacogora, harimo Ituri, Nord-Kivu, Sud-Kivu, Tanganyika na Maniema.
IPC, ihuriro rihuza inzego za ONU n’imiryango mpuzamahanga, ivuga ko urugomo rw’inyeshyamba, kwimuka kw’abaturage ku bwinshi n’ukugabanuka kw’inkunga mpuzamahanga ari byo biri gusunika iki kibazo ku rwego ruteye impungenge. Muri aba baturage, miliyoni 3.2 bakeneye ubutabazi bwihutirwa kugira ngo barokoke.
Raporo igaragaza ko ibintu bimeze nabi mu duce nka Masisi, Walikale, Djugu na Mambasa, ku buryo hafi kimwe cya kabiri cy’abahatuye bari mu nzara ikomeye. Iyangirika ry’ibikorwaremezo, kugabanuka kw’umusaruro w’ubuhinzi n’imibereho yivanzemo ibibazo by'umutekano muke bikomeje gushyira abaturage mu kaga.
IPC iburira ko mu mezi ari imbere, kugeza muri Kamena (06) 2026, abarenga miliyoni 26 bashobora kwibasirwa n'inzara ikabije kurushaho. Uduce twa Lubero, Walikale, Kalehe na Fizi dushobora kugera ku rwego bakenera ubutabazi bwihutise.
Raporo isaba kongera ubufasha no gushora imari mu kongerera abaturage ubushobozi bwo guhangana n’ibyago byo kubura ibiribwa.
kwamamaza