Kiny
Eng
Fr
Amerika: Abadepite batoye umwanzuro usaba Perezida Trump gukura ingabo mu ntambara ya Iran
Uwajeneza Donatha
Jun 4, 2026 - 08:57
Inteko Ishinga Amategeko ya Leta Zunze Ubumwe za Amerika, umutwe w’Abadepite, watoye umwanzuro usaba Perezida Donald Trump gukura ingabo z’iki gihugu mu ntambara ihanganyemo na Iran. Ni mu gihe impaka zikomeje ku bubasha bwa White House bwo gukomeza ibikorwa bya gisirikare itabiherewe uburenganzira na kongere.
kwamamaza
Uyu mwanzuro watowe ku wa Gatatu n’abadepite 215 bawushyigikiye, mu gihe 208 bawurwanyije. Mu bawutoye harimo n’Abarepubulikani bane bifatanyije n’Abademokarate, bifatwa nk’ikimenyetso cy’uko hari abatangiye kugaragaza kutishimira uburyo ubuyobozi bwa Perezida Trump bwitwaye muri aya makimbirane.
Umwanzuro watowe usaba Perezida wa Amerika gukura ingabo z’iki gihugu mu bikorwa by’imirwano na Iran, ndetse bikorwa mu rwego rwo kongera gushimangira ububasha bwa kongere ku bibazo by’intambara.
Nk’uko biteganywa n’Itegeko Nshinga rya Amerika, ububasha bwo gutangaza intambara buri mu nshingano za Kongere. Ni yo mpamvu Abadepite b'abademokarate bavuga ko uyu mwanzuro ugamije kwibutsa ubutegetsi bwa Trump ko ibyemezo byo gukomeza ibikorwa bya gisirikare bidakwiye gufatwa na White House yonyine.
Nyuma y’itora, abagize komisiyo y’ububanyi n’amahanga bo mu ishyaka ry’abademokarate batangaje ko kongere yohereje ubutumwa bukomeye kuri Perezida Trump, basaba ko iyi ntambara irangizwa binyuze mu nzira za dipolomasi aho gukomeza ibikorwa bya gisirikare.
Uyu mwanzuro utowe mu gihe hamaze igihe havugwa ko ubuyobozi bwa Trump bwakomeje ibikorwa bya gisirikare muri Iran butarinze gusaba uburenganzira bwa kongere nk’uko amategeko abiteganya nyuma y’iminsi 60 y’imirwano. White House yo yakomeje kwiregura ivuga ko nyuma y’agahenge katangajwe ku wa 8 Mata (04) nta mirwano ikomeye yari igikomeje, bityo ko nta mpamvu yo kongera kuyisaba uburenganzira.
Nubwo umwanzuro watowe n’Umutwe w’Abadepite, amahirwe yo kuwugira itegeko aracyari make. Urasabwa kubanza kwemezwa na Sena, na yo iherutse gutera indi ntambwe ku mwanzuro usa n’uyu. Ariko n’iyo wakwemezwa n’imitwe yombi ya kongere, Perezida Trump ashobora kuwushyiraho veto.
Kugira ngo iyo veto itsindwe, byasaba ko uwo mwanzuro wongera gutorwa n’ubwiganze bwa bibiri bya gatatu by’amajwi mu mitwe yombi ya kongere, ibigaragazwa nk' ibigoye kugerwaho muri iki gihe.
Icyakora, iri tora rifatwa nk’igitutu gikomeye cya politiki ku buyobozi bwa Trump, cyane cyane mu gihe intambara ya Iran ikomeje kutavugwaho rumwe mu banyapolitiki no mu baturage. Byongeye kandi, bamwe mu Badepite b’abarepubulikani batangiye kugaragaza impungenge ko gukomeza gushyigikira intambara itakunzwe n’abaturage bishobora kugira ingaruka ku matora ateganyijwe mu Ugushyingo (11) uyu mwaka.
@RFI
kwamamaza