Kiny
Eng
Fr
Uregwa kwica ababikira b’Abataliyani i Bujumbura yafatiwe mu Butaliyani nyuma y'imyaka 12
Uwajeneza Donatha
Feb 26, 2026 - 17:14
Umugabo w’imyaka 50 yitwa Guillaume Harushimana, yafatiwe i Parma mu Butaliyani akekwaho kugira uruhare rukomeye mu iyicwa ry’ababikira batatu b’Abataliyani bishwe mu 2014 i Kamenge mu mujyi wa Bujumbura mu Burundi. Ni nyuma y’iperereza rimaze imyaka myinshi rimukorwaho kubera gukekwaho gutegura no gufasha abicanyi babahotoye, bazira ko banze gufasha umutwe w’inyeshyamba z’Abarundi muri Congo.
kwamamaza
Nk’uko ibinyamakuru byo mu Butaliyani bibitangaza, byisunze umushinjacyaha Alfonso D’Avino, Harushimana yafashwe nyuma y’iperereza rimaze imyaka myinshi rikurikiranwa n’inzego z’ubutabera bw’Ubutaliyani.
Ababikira bishwe ni Olga Raschietti (83), Lucia Pulici (75) na Bernardetta Boggian (79), bose bo mu muryango w’aba-Xaverine. Iyicwa ryabo ryabaye inkuru yavuzwe cyane ku rwego mpuzamahanga muri Nzeri (09) 2014 kubera ubugome ndengakamere ubwicanyi bwakoranywe.
Ababikira babiri ba mbere bishwe bakubiswe ibintu bityaye mu mutwe, nyuma bacibwa ingoto, mu gihe uwa gatatu we yishwe mu ijoro ryakurikiyeho ageze aho babaga, kuko bishe bagenzi be adahari, na we yicwa aciwe umutwe.
Umushinjacyaha D’Avino avuga ko Harushimana yagize uruhare rw’ibanze mu gutegura no korohereza abicanyi, abaha amakuru, abafungurira urugo rw’ababikira ndetse anabafasha kubahisha mbere y’uko bakora ubwo bwicanyi. Yavuze ko yari umuntu wizerwaga n’uwari ukuriye umuryango w’abo babikira, ariko akabikoresha mu gutegura icyaha.
Iperereza rivuga ko icyatumye bicwa ari uko bari banze gufasha umutwe w’inyeshyamba z’Abarundi wakoreraga muri Congo, cyane mu bijyanye no kuvura no gutanga imiti.
Umushinjacyaha D’Avino kandi yavuze ko mu iperereza basanze abateguye n’abakoze ubwo bwicanyi bose barakoranye mu ibanga n’igipolisi cy’u Burundi, kandi ngo bahawe amabwiriza na Gen. Adolphe Nshimirimana, bikekwa ko ari we wategetse iyicwa ryabo. Gen. Nshimirimana yishwe arashwe mu 2015.
Harushimana bivugwa ko yagiye mu Butaliyani mu 2015 nyuma y’uko izina rye rivuzwe kuri radio n’abantu bemeye ko ari bo bishe abo babikira. Umwe muri abo bemeye icyaha na we yaje kwicwa nyuma.
Kugeza ubu, Harushimana ntaragezwa imbere y’ubucamanza kandi nta cyo aratangaza ku byo aregwa, mu gihe iperereza rikomeje kugira ngo hakurikizwe amategeko.
@BBC
kwamamaza