Kiny
Eng
Fr
Ukraine irashinja Uburusiya kugaba ibitero byinshi nyuma y'agahenge ka Pasika
Uwajeneza Donatha
Apr 21, 2025 - 10:55
Igisirikare cya Ukraine kivuga ko mu ntara zitandukanye zataye zigabweho igitero n'indege zitagira abapilote (drone) z'Uburusiya. Ibi byabaye nyuma y'amasaha make gusa habaye agahenge ka Pasika kamaze amasaha 30 gatangajwe n'ubutegetsi bw'Uburusiya.
kwamamaza
Igisirikare cya Ukraine kirwanira mu kirere cyasohoye ubutumwa buburira mu ntara ya Kyiv, kimwe no mu ntara za Kherson, Dnipropetrovsk, Cherkasy, Mykolaiv na Zaporizhzhia.
Umuyobozi w'U mujyi wa Mykolaiv uherereye mu majyepfo, Oleksandr Senkevych, yavuze ko humvikanye ibiturika ariko ntibahise bamenya niba hari abapfuye cyangwa abakomeretse.
Ku rundi ruhande, Igisirikare cy'Uburusiya ntacyo kiratangaza kuri ibi bitero bivugwa. Agahenge kari katangajwe na Perezida Vladimir Putin karangiye saa kumi n'ebyiri z'umugoroba wo ku cyumweru, mu masaha ya Moscou (saa kumi n'imwe za Kigali), aho impande zombi zishinjanya kutakubahiriza.
Mu rukerera rwo kur'uyu wa mbere, abategetsi b'uturere basabye ababa mu mijyi itandukanye, harimo n'umurwa mukuru Kyiv, guhungira ahantu hagenewe kwihisha kubera gukeka ko hashobora kuba ibitero bya za drone.
Igisirikare cya Ukraine kirwanira mu kirere cyavuze ko hashobora kuba ibitero bya missile mu ntara zo hagati mu gihugu, kandi ko indege z'intambara z'Uburusiya zari ziri mu myiteguro ahagana mu majyaruguru ashyira Iburasirazuba ndetse no mu Burasirazuba.
Amasaha make nyuma y'aho aka gahenge karangiriye, umuvugizi w'ibiro by'umukuru w'igihugu cy'Uburusiya( Kremlin) Dmitry Peskov, yavuze ko nta tegeko Putin yatanze ryo gukongereza, nk'uko bitangazwa n'ibiro ntaramakudu bya Leta, Tass.
Icyakora BBC dukesha iyi nkuru ivuga ko itazi neza niba ibitangazwa n'ibi bihugu byombi ari ukuri.
Ku cyumweru, Perezida Donald Trump wa Leta Zunze Ubumwe za Amerika usanzwe ariko ashaka uko intambara yarangira, yavuze ko hari icyizere ko Uburusiya na Ukraine bishobora kugera ku masezerano y'amahoro muri iki cyumweru. Nta bindi bisobanudo yatanze.
Uburusiya bwatangije intambara yeruye kuri Ukraine ku wa 24 Gashyantare(2) 2022, ubu bukaba bugenzura hafi 20% by'ubutaka bwa Ukraine, harimo akarere ka Crimée/Crimea bwiyometseho mu 2014.
Bivugwa ko abantu ibihumbi amagana- benshi muri bo ari abasirikare bamaze kwicwa cyangwa gukomereka ku mpande zombi kuva mu 2022.
Mu kwezi gushize, Moscou yasohoye urutonde rurerure rw'ibyo isaba kugira ngo intambara ihagarare nk'uko Amerika na Ukraine bibyifuza.
Ku wa gatandatu, Perezida Putin yavuze ko imirwano yari guhagarara kuva saa 18:00 ku isaha ya Moscou, ariko kuri uwo munsi kugeza ku saa 6:00 zo ku cyumweru Leta ya Kyiv ivuga ko yari kubyubahiriza.
kwamamaza