Ibi yabitangaje asa n’uca amarenga ko ashobora gukoresha intwaro za nikleyeri muri Ukraine.

Mu ijambo rye yaraye atangaje, Putin yavuze ko Leta ye iri gutekereza uburyo yahindura amategeko agenga uburyo Uburusiya bushobora gukoresha intwaro za Nikleyeli.

Ubusanzwe Ukraine ni igihugu kidatunze bene izi ntwaro ariko gihabwa ubufasha bwa gisirikare na Leta Zunze Ubumwe za Amerika hamwe n'ibindi bihugu bitunze intwaro za nikleyeri.

Putin yatangaje ibi mu gihe Ukraine iri gusaba uburenganzira bwo gukoresha ibisasu bya misile birasa mu ntera ndende ihabwa n’ibihugu byo mu burengerazuba bw’isi, aho ishaka kubirasa nko ku bigo bya gisilikari by’Uburusiya.

Perezida Volodymyr Zelensky wa Ukraine uri mu rugendo muri Amerika, biteganyijwe ko ko ahura na Perezida Joe Biden I Washington kur’uyu wa kane, aho byitezwe ko ibisabwa na Ukraine biza kuba biri mu bibazo nyamukuru baza kuganirako.

Ukraine yatangije igitero ku butaka bw’Uburusiya muri uyu mwaka ishaka gutera ibigo byo hagati mu Burusiya ivuga ko birasa ibisasu bya misile muri Ukraine.

Asubiza ibyatangajwe na Putin, umukuru w'ibiro by'umukuru w'igihugu cya Ukraine, Andriy Yermak, yavuze ko Uburusiya nta kindi kintu bufite bwo gutera ubwoba amahanga atari intwaro z’ubumara za Nikleyeli.

Mbere y’ibi, Putin yari amaze gutangaza ko ashobora gukoresha intwaro za nikleyeri. Ukraine irabinenga, ikavuga ko ari amayeri yo gukangisha izo ntwaro mu rwego rwo gushaka uburyo inshuti za Ukraine zitakomeza kuyifasha.

Ubushinwa, inshuti ikomeye y'Uburusiya, buba bwifuza ituze, amakuru avuga ko Perezida Xi Jinping yaburiye Putin ku ikoreshwa ry'intwaro za nikleyeli.

Ariko nyuma yo kuganira n'Inama y'igihugu ishinzwe umutekano, yatangaje iyi gahunda yo kwagura bikomeye aya mabwirizwa.

Agaruka ku mabwiriza mashya agenga intwaro za Nikleyeli, yavuze ko azerekana neza ibisabwa kugira ngo Uburusiya bukoreshe intwaro za nikleyeli. Avuga ko harimo ibitero byakorwa ku Burusiya hakoreshejwe ibisasu bisanzwe bya misile.

Avuga ko Uburusiya buzareba niba bushobora gukoresha izi ntwaro buramutse bubonye ko hari igitero gikomeye cy'ibisasu bya misile, indege z'intambara n'indege zitagira abapilote (drone) gikorewe ku butaka bwabwo, igishobora kandi guteza akaga gakomeye ku busugire bw'igihugu.

Yongerako ko "Hasabwe ko igitero ku Burusiya cyakorwa n'igihugu kidatunze intwaro za nikleyeri, ariko harimo uruhare cyangwa ubufasha bw'igihugu gitunze intwaro za nikleyeri, cyafatwa nk'igitero rusange ku Burusiya".

Putin avuga ko intwaro za nikleyeli zabaye ishingiro mu gukomeza umutekano w'igihugu cye n'abaturage bacyo.

Kuva intambara ya kabiri y'isi yose irangiye, ibihugu bitunze ibirwanisho bya nikleyeli byakomeje politike yo gukangana, yari ishingiye ku gitekerezo cy'uko ari nka hamwe byagera ibihugu bishyamiranye bikarasana hakoreshejwe izo ntwaro kirimbuzi byavamo kusenyana.

Ariko kandi hari intwaro za nikleyeli zishobora gukoreshwa mu ntambara, ibi bikaba ari ibisasu bya misile bito bibamo ibiturika bya nikleyeli bikoreshwa mu ggusenya ibigo by'umwanzi bitarinze gusohora ubumara buhambaye.

Muri Kamena (6), Putin yaburoye ibihugu bifasha Ukraine, avuga ko Uburusiya bufite intwaro nyinshi cyane z’ubumara zishobora gukoreshwa mu ntambara kurusha ibiri ku mugabane w’Uburayi, ati ‘nubwo Amerika yazana ibyayo.’

Yongeyeko “Ubulayi ntabwo bufite uburyo buteye imbere yo kwirwanaho, rero nta bushobozi buhagije bufite bwo kwirinda.”

Ico gihe, yumvikanishaga ko impinduka mu mategeko y’Uburusiya ajyanye n’ikoreshwa ry’intwaro za nikleyeli; inyandiko zerekana ibisabwa kugira ngo bushobore gukoresha izo ntwaro kirimbuzi z’ubumara.