Kiny
Eng
Fr
Madagascar: Ishami rya gisirikare ryafashije Rajoelina kujya ku butegetsi niryo ryamuhiritse
Uwajeneza Donatha
Oct 15, 2025 - 08:03
kwamamaza
Ishami ry’igisirikare rya Madagascar, CAPSAT, ryatangaje ko ryafashe ubutegetsi, rikurikirana imyigaragambyo yo kwamagana ubutegetsi bwa Perezida Andry Rajoelina yatangiye ku wa 25 Nyakanga (07) 2025. Ni mu gihe muri 2009, CAPSAT yari yaramushyigikiye, rimufasha gufata ubutegetsi ahiritse uwari perezida, Marc Ravalomanana.
Col Michael Randrianirina yavuze ko CAPSAT izashyiraho komite izaba igizwe n’igisirikare, abajandarume n’igipolisi, hamwe n’abajyanama b’abasivile. Iyo komite irashyira mu bikorwa inshingano nk'iz'umukuru w’igihugu. Yanavuze ko mu minsi mike hazashyirwaho Leta.
Col Randrianirina yavuze kandi ko abari mu myigaragambyo, cyane urubyiruko rwa Gen Z, bazagira uruhare muri izo mpinduka.
Avuga ko nta mukuru w’igihugu cyangwa leta bihari, kandi ko inzego zose zashinzwe hisunzwe itegeko nshinga zahagaritswe by’agateganyo, uretse inteko nshingamategeko yari yakoze amatora yo kweguza Perezida Andry Rajoelina. CAPSAT yatangaje ko nyuma y’imyaka ibiri aribwo hazaba amatora ya Perezida.
Perezida Rajoelina ntacyo aratangaza kuri iri tangazo ry'igisirikare cyahoze ku ruhande rwe, kandi nta muntu azi aho aherereye, uretse ibivugwa ko yaba yarahungishijwe n'indege ya gisirikare y'Ubufaransa.
Mu ijambo rye riheruka, Andry Rajoelina yari yamagenye ibyo kumuhirika ku butegetsi, avuga ko akiri Perezida nubwo aho yari aherereye hatari hazwi. Ibi bibaye nyuma yaho Igisirikare cyahagarikaga inyigaragambyo gisisemo kwifatanya n'abaturage bamaganaga ihagarikwa ry'amazi n'amashanyarazi, rigasaba ko Perezida Rajoelina yegura ku mwanya w'umukuru w'igihugu.
kwamamaza