Kiny
Eng
Fr
Ebola yongeye kwaduka mu Burasirazuba bwa RDC, impungenge z’ikwirakwira ryayo ziriyongera
Uwajeneza Donatha
May 15, 2026 - 18:12
Ikigo Nyafurika gishinzwe gukumira no kurwanya indwara, Africa CDC, cyatangaje ko mu burasirazuba bwa Repubulika Iharanira Demokarasi ya Congo hadutse icyorezo gishya cya Ebola kimaze gukekwaho abantu 246 no guhitana abasaga 65. Ni mu gihe impungenge z’ikwirakwira ryacyo mu bihugu bituranye zikomeje kwiyongera. Ibi bibaye mu gihe Isi ikomeje gukurikirana hafi icyorezo cya Hantavirus kimaze kugaragara mu bice bya Amerika, Aziya n’Uburayi, ndetse n’ibihugu byinshi birimo u Rwanda bikaba biri gukaza ubwirinzi.
kwamamaza
Ikigo cya Afurika gishinzwe gukumira no kurwanya indwara, Africa CDC, cyemeje ko icyorezo cya Ebola cyongeye kwaduka mu Ntara ya Ituri mu burasirazuba bwa RDC, hafi y’imipaka ihuza iki gihugu na Sudani y’Epfo ndetse na Uganda.
Amakuru yatangajwe n’iki kigo agaragaza ko abantu 246 bamaze gukekwaho kwandura iki cyorezo, mu gihe abagera kuri 65 bamaze guhitanwa na cyo, nubwo bose batarapimwa ngo hemezwe ko bishwe na Ebola.
Mu bipimo 20 byoherejwe gupimirwa i Kinshasa mu Kigo cy’Igihugu gishinzwe ubushakashatsi mu by’ubuzima, INRB, ibipimo 13 byagaragaye ko ari Ebola.
RFI ivuga ko igiteye impungenge kurushaho ari uko aka gace kibasiwe n’iki cyorezo gasanzwe karugarijwe n’umutekano muke uterwa n’amakimbirane hagati y’amoko mu gace ka Djugu ndetse n’ibitero by’umutwe wa ADF ukorera muri Irumu. Abashinzwe ubuzima bavuga ko ibi bishobora gukoma mu nkokora ibikorwa byo gutanga ubuvuzi no gukumira ikwirakwira ry’iki cyorezo.
Ubwoko bwa Ebola buri kwibasira aka gace kanasanzwe kibasirwa na Marbury budafitiwe urukingo cyangwa umuti kugeza ubu.
Raporo y’inzego z’ubuzima muri Ituri ivuga ko impfu za mbere zifitanye isano n’iki cyorezo zatangiye kugaragara muri Mata (04) 2026, mbere y’uko ubwandu n’impfu bikomeza kwiyongera muri Gicurasi (05) cyane cyane mu duce twa Mongwalu na Rwampara.
Africa CDC yavuze ko hari impungenge zikomeye z’uko iki cyorezo gishobora gukwira mu karere kubera urujya n’uruza rw’abantu hagati ya RDC, Uganda na Sudani y’Epfo, cyane cyane muri ibi bice byegereye imipaka.
Ni muri urwo rwego hateguwe inama yihutirwa ihuza abayobozi b’inzego z’ubuzima zo muri ibi bihugu hamwe n’imiryango mpuzamahanga irimo OMS na UNICEF ndetse n’inganda zikora imiti, hagamijwe guhuza imbaraga mu gukumira iki cyorezo.
Ebola yandurira mu matembabuzi y’umubiri, aho ibimenyetso byayo bikunze kuba umuriro ukabije, kuruka, impiswi ndetse no kuva amaraso. Umuntu wanduye atangira kwanduza abandi nyuma yo gutangira kugaragaza ibimenyetso by’iyi ndwara, bishobora kugaragara hagati y’iminsi ibiri na 21 nyuma yo kwandura.
kwamamaza