Kiny
Eng
Fr
Visit Rwanda yabaye umuterankunga w'amakipe abiri yo muri America
Uwajeneza Donatha
Sep 29, 2025 - 19:10
Urwego rw’Igihugu rw’Iterambere (RDB) rwatangaje ko Visit Rwanda yabaye umuterankunga wa Los Angeles Clippers ikina muri Shampiyona ya Basketball ya Amerika (NBA) ndetse na Los Angeles Rams ikina muri National Football League (NFL). Aya masezerano yitezweho gufasha u Rwanda kugera ku ntego yo kwinjiza miliyari 1$ binyuze mu bukerarugendo mu myaka 4 iri imbere.
kwamamaza
Ni ubwa mbere ikigo gikomoka muri Afurika cyamamaje muri NBA no muri NFL muri Amerika.
Aya masezerano yatangajwe ku wa 29 Nzeri (09) 2025, yitezweho gufasha u Rwanda kugera ku ntego yo kwinjiza miliyari $1 y’ubukerarugendo bitarenze mu 2029. Nimugihe muri 2024 yinjije miliyoni $650 muri 2024.
Muri bufatanye bushya, LA Clippers izafasha mu kuvugurura ibibuga bya Basketball mu Rwanda, itange amahugurwa ku batoza b’Abanyarwanda buri mwaka binyuze mu ikipe yayo ya G League (San Diego Clippers), ndetse izohereze impuguke mu guteza imbere impano z’abakiri bato.
Ku rundi ruhande, Los Angeles Rams izajya yamamaza Visit Rwanda ku kibuga cya SoFi Stadium cyakira abafana ibihumbi 70, kuri Hollywood Park ndetse no kuri Intuit Dome yakira imikino ya LA Clippers. Logo ya Visit Rwanda izajya inagaragara ku myambaro y’imyitozo n’iy’imikino y’aya makipe.
Umuyobozi Mukuru wa RDB, Jean-Guy Afrika, yavuze ko aya masezerano azubaka umubano hagati y’u Rwanda na Los Angeles.
Yagize ati: “Binyuze mu bufatanye bwa LA Clippers na LA Rams, u Rwanda na Los Angeles bizagirana ubumwe mu guteza imbere imikino.”
Iyi gahunda yiyongereye ku yansi masezerano Visit Rwanda ifitanye na Arsenal yo mu Bwongereza, Paris Saint-Germain yo mu Bufaransa, Atlético de Madrid yo muri Espagne na FC Bayern Munich yo mu Budage, byose bigamije kumenyekanisha u Rwanda no guteza imbere ubukerarugendo.
kwamamaza