Kiny
Eng
Fr
Uburusiya bwatangaje icyo bwakora mugihe Groenland yakongererwa imbaraga za gisirikare n'ibihugu by'Iburengerazuba
Uwajeneza Donatha
Feb 11, 2026 - 14:14
Uburusiya bwatangaje ko buzafata ingamba zikwiye, harimo n’izishingiye ku gisirikare, mu gihe ibihugu by’Uburengerazuba bw'Isi byakongera ibikorwa bya gisirikare muri Groenland. Minisitiri w’Ububanyi n’Amahanga w’Uburusiya, Sergei Lavrov, yabitangarije mu nteko ishinga amategeko, ashyira imbere impungenge z’umutekano w’igihugu cye.
kwamamaza
Lavrov yagize ati:" Mu gihe Groenland izaba ishyizweho ubushobozi bwa gisirikare bugamije Uburusiya, tuzafata ingamba zikwiye, harimo iz’igisirikare n’ikoranabuhanga.”
Ibi yabitangaje nyuma yaho ibihugu byo mu Burengerazuba bw'Isi bikomeje kugaragaza ubushake bwo kongera ibikorwa byabo bya gisirikare hafi y’akarere gafite agaciro ku bijyanye n'umutekano w’ibihugu nk'Uburusiya ndetse na Amerika.
Perezida Trump yifuje kenshi ko iki kirwa cyegurirwa igihugu cye ku bw'impamvu yavugaga ko ari iz'umutekano wa Amerika ndatse n'Isi muri rusange. Yavugaga ko nihatabaho ubwumvikane hashobora gukoreshwa imbaraga za gisirikare. Gusa mu nama mpuzamahanga y'ubukungu, byarangira Trump avuze ko nta mbaraga z'igisirikare Amerika izakoresha, asaba Danmark kwemera hakabaho ibiganiro.
Ikirwa cya Groenland kigenzirwa na Danemark giherereye hagati y'Uburusiya na Amerika ndetse Amerika isanzwe ihafite ibirindiro bya gisirikare.
kwamamaza