Kiny
Eng
Fr
Rwamagana- Munyiginya: Abaturage bongeye kurarana n'amatungo kubera abajura
Gisubizo Philemon
May 21, 2024 - 09:14
Hari abaturage bo mu murenge wa Munyiginya mu karere ka Rwamagana bavuga ko nubwo kurarana n’amatungo byaciwe bongeye kurarana nayo bitewe n’abajura bibasiye aka gace babibira amatungo. Ubuyobozi bw’akarere ka Rwamagana buvuga ko kurarana n’amatungo atari wo muti ahubwo bakwiye gufatanya bagashyira imbaraga mu kwicungira umutekano binyuze mu irondo nabwo bukababa hafi.
kwamamaza
Aba baturage bo mu murenge wa Munyiginya bavuga ko bibasiwe n’abajura babibira amatungo, ibyatumye bafata umwanzuro wo kongera kurarana nayo mu rwego rwo kwizera umutekano w’ibyabo, kuko ngo niyo aba bajura bafashwe bucya bagarutse bakongera bakabazengereza.
Umwe ati "amatungo tugomba kurarana nayo, waba woroye agahene kamwe umuntu akaza akakagutwara ejo uzagakuraho mituweli uhitamo kurarana nako kugirango batagatwara".
Undi ati "ihene imwe narimfite yarapfuye hanyuma akagurube ko narimfite baragatwaye, narimfite inkoko barazibye".
Ubuyobozi bw’akarere ka Rwamagana uyu murenge uherereyemo, buvuga ko kurarana n’amatungo atariwo muti ahubwo ngo bakwiye gushyira imbaraga mu gukaza irondo maze ubuyobozi nabwo bukababa hafi.
Jeanne Umutoni umuyobozi wungirije w’akarere ka Rwamagana ushinzwe imibereho myiza ati "amatungo yabo ni ukuyashyira hanze nkuko duhora tubibakangurira hanyuma bakagira uruhare mu gukora irondo, ingo zose zivuze ngo zirarane n'amatungo kubera ko habaye ikibazo cyo kwibwa ibyo nibyo dukomeza guhangana nabyo, ntabwo aribwo buryo bwo gukemuramo ikibazo ariko iyo twicaye mu midugudu dushobora kubona ibisubizo".
Akomeza agira ati "Tuzakurikirana turebe ikibazo gihari, niba ari ikibazo cy'umwihariko cy'umuntu ariko ari icy'umudugudu wose twafatanya tukagikemura".
Uyu murenge wa Munyiginya kandi nta sitasiyo ya Polisi cyangwa RIB ihabarizwa, ibyo Umuvugizi wa Polisi mu Ntara y'Iburasirazuba, SP Hamdun Twizeyimana avuga ko hari ibikibura ngo izi nzego zihashyirwe, gusa ngo kuba ibi bitarakorwa ntibibuza Polisi kuharindira umutekano ndetse ngo iki kibazo cy’ubujura kigiye guhagurukirwa byisumbuyeho.
Ati "muri gahunda ya Polisi nuko imirenge yose igomba kugira sitasiyo ariko bisaba ibintu byinshi, bisaba abakozi, bisaba ibikoresho, bisaba gushaka aho bakorera n'aho baba ni muri urwo rwego hari imirenge imwe n'imwe itarabona Abapolisi ariko mugihe bitarahagera haba hari indi sitasiyo ya Polisi ibakurikirana, nubwo nta Polisi ihari na RIB ariko DASSO barahari tubasha gufatanya tugakurikirana, kuba tubonye amakuru tugiye gukurikirana kuburyo irondo ribasha gukora neza natwe tubabe hafi turebe ko twakomeza kurinda umutekano, nabo barasabwa gufatanya natwe bakaduha amakuru".
Intara y’Iburasirazuba igizwe n’imirenge 95, muri yo 79 niyo ifite sitasiyo za Polisi, ariko ngo hari gahunda yuko nibura muri buri murenge hagomba kubakwa iyi sitasiyo ibyitezweho kongera umutekano w’abaturage n’ibyayo.
Inkuru ya Yassini Tuyishimire / Isango Star Rwamagana
kwamamaza