Kiny
Eng
Fr
Muhanga: Abatuye mu Ndiza barishimira ko begerejwe ibikorwaremezo
Gisubizo Philemon
Jul 4, 2024 - 12:36
Abatuye mu mirenge y'imisozi ahahoze ari muri Ndiza mu karere ka Muhanga, bashima Paul Kagame umukandida wa FPR-Inkotanyi waberetse urukundo, akazamuka imisozi yaho aje kureba uko birengagijwe n'ubutegetsi bwa mbere ya Jenoside yakorewe Abatutsi mu 1994, ngo ubwitange yakoresheje abahindurira ubuzima bazamwitura bamutora 100%.
kwamamaza
Kumva neza akamaro FPR- Inkotanyi ndetse na Paul Kagame umukandida wayo bagiriye abaturage bo mu murenge wa Rongi mu karere ka Muhanga ndetse no mu misozi y’icyahoze ari Ndiza, bisobanurwa neza na Kalinijabo Barthelemy, umwe mu bakandida-Depite ba FPR wakuriye muri ibi bice. Aha niho ahera asaba abaturage bahatuye, kuzatora Paul Kagame na FPR-Inkotanyi mu rwego rwo kwitura ibyiza bagejejweho.
Ati "abategetsi babaye muri iki gihugu bose Nyakubahwa Paul Kagame niwe wakojeje ikirenge ahangaha yemera kurira imisozi asanga abanyarwanda bino ahangaha aje kubaka ubumwe bwacu, atuzaniye iterambere, atuzaniye amahoro, tuzamutora tumwiture ibyiza yagejeje kubanyarwanda".
Nisingizwe Annociata umwe mu bimuwe mu manegeka yo mu misozi ya Ndiza mu murenge wa Nyabinoni agatuzwa mu mudugudu w’icyitegererezo wa Horezo, ashima uburyo Paul Kagame umukandida wa FPR-Inkotanyi yabakuye ahashyiraga ubuzima bwabo mu kaga, bityo ngo iyo mpamvu iri mu zindi nyinshi zituma bazamutora 100% kimwe na FPR Inkotanyi.
Ati "twari dutuye mu kagari ka Muvumba mu murenge wa Nyabinoni akagari k'imisozi miremire ihanamye cyane iteye ubwoba, ako kagari tugatuyemo twari tubayeho nabi, twari dutuye munzu z'ibyatsi turyama mubyatsi tukiyorosa ibyatsi, ubwo buzima twabubayemo imyaka myinshi, FPR irangajwe imbere na Nyakubakwa Paul Kagame yadutekerejeho atwubakira amazu meza y'icyitegererezo".
Niyigaba Francois ushinzwe ibikorwa byo kwamamaza umuryango FPR-Inkotanyi kuri Site ya Rongi mu karere ka Muhanga, avuga ko ibyo umukandida wa FPR-Inkotanyi Paul Kagame ateganya kugeza ku batuye mu gice cyo mu misozi ya Ndiza ari byinshi, abasaba kuzamutora ndetse n’Abadepite ba FPR, kugirango imihigo ikomeze.
Muri manda y’imyaka irindwi ishize y’umuryango FPR-Inkotanyi n’umukandida wayo Paul Kagame, abo mu gice cy’imisozi y’icyahoze ari Ndiza mu mirenge ya Kiyumba, Rongi, Kabacuzi, Nyabinoni, Mushishiro na Kibangu, bishimira ibitaro bikuru Nyabicyenke bubakiwe byabaruhuye gukora ingendo ndende bajya i Kabgayi ndetse n’i Ruli muri Gakenke. Ni mu gihe kandi bafite n’ibigo nderabuzima bitanu aribyo Buramba,Gasagara, Nyabinoni, Nyabicyenke na Gitega.
Inkuru ya Djamali Habarurema / Isango Star Muhanga
kwamamaza