Kiny
Eng
Fr
Iran yakatiye Abafaransa babiri igihano gikomeye ibashinja ubutasi
Uwajeneza Donatha
Oct 14, 2025 - 15:02
Urukiko rwa Iran rwakatiye Abafaransa babiri ibihano bikomeye rubashinja ubutasi ku nyungu z’u Bufaransa n’Israeli, nk’uko byatangajwe ku wa 14 Ukwakira (10) 2025 n’ikinyamakuru Mizan gikorera urwego rw’ubucamanza rwa Iran.
kwamamaza
Abo Bafaransa, bivugwa ko ari Cécile Kohler na Jacques Paris, bafunzwe kuva ku wa 9 Werurwe (03) 2023. Bose bashinjwa gukorana n’inzego z’ubutasi z’u Bufaransa n’iz’Israeli, ndetse no gukora ibikorwa bihungabanya umutekano wa Iran.
Amakuru yemeza ko umwe muri aba yakatiwe imyaka 32, undi 28, bitewe n’uko umwe yagizwe umwere ku cyaha kimwe cyoroheje. Kohler yakatiwe imyaka 10 kubera gukorana n’ubutasi bw’u Bufaransa, 17 kubera gukorana n’ubutasi bwa Israeli, n’imyaka 5 kubera ibikorwa bihungabanya umutekano wa Iran. Paris we yakatiwe imyaka 6, 5 na 17 ku byaha bisa n’ibyo.
Ni urubanza rw’urwego rwa mbere, bivuze ko bashobora kujurira. Gusa, nk’uko amategeko ya Iran abiteganya, abakatiwe bazashyira mu bikorwa igihano gikomeye kurusha ibindi, bivuze ko bashobora guhabwa igihano cy'imyaka 17 na 20 y’igifungo.
Ibi bihano bije mu gihe Iran n' u Bufaransa bari mu biganiro bigamije no guherererkanya imfungwa, aho Ubufaransa isaba irekurwa rya Kohler na Paris, naho Teheran igasaba ko burekura Mahdieh Esfandiari, umunyeshuri ukomoka muri Iran wigaga muri Lyon ufungiye mu Bufaransa ashinjwa gushyigikira imitwe y’iterabwoba.
kwamamaza