Kiny
Eng
Fr
Amerika iri kwiga ku kibazo cya Liban mu kurengera agahenge kayo na Iran, Israel yakomeje ibitero
Uwajeneza Donatha
Apr 10, 2026 - 08:34
Mu gihe Amerika iri gutegura ibiganiro bizayihuza Liban na Israel i Washington mu cyumweru gitaha, hagamijwe kugabanya imirwano no kurinda agahenge kari hagati yayo na Iran. Ni nyuma y'aho Israel yanze ko agahenge ka Amerika na Iran katareba intambara yo guhashya umutwe wa Hezbollah muri Liban, Iran na Loni bikagaragaza ko bikomeje kubangamira agahenge n'ifungurwa ry'inzira rya Hormuz.
kwamamaza
Nyuma y'itangazwa ry'agahenge kuri Iran, Israel yagabye ibitero bikaze i Beirut bihitana abasaga 300 ndetse Iran na Loni bibigaragaza nk'ibikomeje gushyira mu kaga gahunda z’amahoro.
Amerika yatangaje ko mu cyumweru gitaha izakira ibiganiro bizayihuza na Israel na Liban, byitezweho kugabanya ubushyamirane no kuganira ku kibazo cyo kwambura intwaro umutwe wa Hezbollah.
Ibi biganiro bije byunganira ibindi biteganyijwe kubera i Islamabad muri Pakistan, aho Amerika na Iran bagomba kuganira ku buryo bwo guhagarika burundu intambara mu gihe cy’iminsi 15 y’agahenge bemeranyijeho.
Icyakora, umwuka wakomeje kuzamo igitotsi nyuma y’uko ku wa Gatatu Israel igabye ibitero bikomeye i Beirut bigahitana abarenga 300 nk’uko byatangajwe na Minisiteri y’Ubuzima ya Liban. Ni ibitero bivugwa ko ari byo bikomeye igihugu cyahuye nabyo kuva mu 1982.
Perezida wa Iran, Massoud Pezeshkian, yavuze ko ibi bitero bituma ibiganiro by’amahoro bisa n’ibitagifite ishingiro, mu gihe uruhande rwa Amerika rwo rugaragaza ko rugifite icyizere cyo kugera ku masezerano.
Minisitiri w’Intebe wa Israel, Benjamin Netanyahu, yongeye gushimangira ko nta gahenge kazashyirwaho, anavuga ko n’ubwo hatangiye indi gahunda y’ibiganiro bya dipolomasi na Lebanon, Israel izakomeza kugaba ibitero ku butaka bwayo.
Hagati aho, Visi Perezida wa Amerika, J. D. Vance, uyoboye itsinda ry’Abanyamerika mu biganiro, ari kugerageza gutandukanya ikibazo cya Liban n’icya Iran, ashimangira ko kuba Liban iguye kuganira na Israel nk’igihugu cyigenga bitatuma ibiganiro na Iran bihagarara, ahubwo isabwa gutanga imyanzuro ifatika no kwemera ibyo Amerika isaba mu rwego rwo kugera ku masezerano arambye.
Ku rundi ruhande, imirwano irakomeje aho Hezbollah yatangaje ko yarashe za roketi n’indege zitagira abapilote ku birindiro by’ingabo za Israel no ku mijyi yo ku mupaka, mu gihe impuruza zumvikanye no mu bice birimo Tel-Aviv.
@RFI
kwamamaza