Kiny
Eng
Fr
Abarwanyi ba AFC/M23 mu rugamba rwo kwisubiza ibice yari yambuwe muri Masisi
Uwajeneza Donatha
Feb 27, 2026 - 14:34
Abarwanyi ba AFC/M23 bongeye kugaba ibitero bikaze muri teritwari ya Masisi, bagamije kwisubiza uduce bari barambuwe mu cyumweru gishize n’imitwe ya Wazalendo ifatanyije na FARDC. Iyi mirwano yatangiye ku wa 26 Gashyantare (02) imaze guhitana nibura abasivili bane, inka zirenga 80 zirasahurwa ndetse abaturage bo muri ibyo bice bava mu byabo.
kwamamaza
Umutekano wakomeje kuzamba mu bice bitandukanye bya Masisi, muri Kivu y’Amajyaruguru, nyuma y’uko AFC/M23 itangiye igitero simusiga ku mirongo y'imbere ku rugamba, ahafite akamaro kanini.
Ku wa Gatatu, uyu mutwe wongeye kwigarurira imidugudu ya Kaniro, Kasenyi na Katobotobo muri Kibabi ya mbere. Naho ku wa Kane mu gitondo, imirwano yarushijeho gukaza umurego ku bice bitandukanye birimo:
Axe ya Katoyi: Imirwano ikomeye yabereye ahitwa Katovu, nko mu bilometero bitandatu uvuye ku mujyi wa Katoyi, agace kari kaherutse kwisubizwa n’abarwanyi ba Wazalendo bo mu mutwe wa PARECO.
Naho muri Nyamaboko ya mbere, humvikanye amasasu menshi yumvikanye i Mashaki hafi ya Kazinga.
Naho ku murongo wo mu gace k'ahitwa Mahanga: Imidugudu ya Kibande na Luke na yo yabereyemo imirwano, byongera impungenge mu baturage.
Ni mu gihe abaturage bari bahunze imirwano yabereye muri aka gace, ku wa gatatu baguye mu gico cy'inyeshyamba ahitwa i Kishonja. Abashumba batatu bahasize ubuzima, inka zirenga 80 ziranyagwa.
Amakuru aturuka mu baturage avuga ko hari n’umusore warashwe akahasiga ubuzima, undi agashimutwa, kugeza ubu irengero rye rikaba ritaramenyekana.
Iyi mirwano mishya yatumye imiryango myinshi yongera guhunga, yerekeza mu duce ibona ko dufite umutekano kurushaho, cyane cyane hafi ya Goma no mu nkengero zaho, aho inkambi z’abavuye mu byabo zisanzwe zuzuye.
Sosiyete sivile zirasaba ko hafatwa ingamba zihuse zo kurinda abasivili bari hagati y’impande zihanganye no guhagarika ubwicanyi bukomeje kwiyongera muri Masisi.
@Radio Okapi
kwamamaza