Kiny
Eng
Fr
Trump yatangaje ko Israel na Iran barenze ku masezerano y’agahenge, yihanangiriza Israel
Uwajeneza Donatha
Jun 24, 2025 - 15:48
Perezida wa Leta Zunze Ubumwe za Amerika, Donald Trump, yatangaje ko Iran na Israel barenze ku masezerano y’agahenge yari amaze gutangazwa. Avuga ko ari ibintu bishobora kongera gukongeza intambara, yihanangiriza uruhande rwashobora kubura ibitero, cyane ariko Israel.
kwamamaza
Ibi yabivuze kuri uyu wa Kabiri, amasaha make mbere yuko yurira indege imujyana i Burayi mu nama ya OTAN.
Yavuze ko yababajwe cyane no kuba agahenge kari katangajwe ibihugu byombi byakarenzeho. Nyuma gato y’iryo tangazo, Israel yatangaje ko yarashe igisasu cya Iran cyari cyinjiriye mu majyaruguru y’igihugu, maze ihita itangaza igikorwa cyo kwihorera.
Trump yabwiye Israel ati: “Nimutuze. Ntimuyiraseho bombe (Iran). Iyo mubikoze, muba mwishe amasezerano y’agahenge.”
Yanavuze ko atashimishijwe n’imyitwarire y’impande zombi, ariko ko Israel iri kurushaho guteza impagarara.
Mukuyihanangiriza, yagize ati: “Musubize indege zanyu mu gihugu cyanyu, nonaha.”
Iran yavuze ko yahaye isomo rikomeye Israel
Mbere y’uko agahenge gatangazwa, ingabo za Gardiens de la Révolution za Iran zagabye ibitero ku nyubako za gisirikare za Israel. Mu itangazo basohoye, bagize bati: “Twahaye Israel isomo rikomeye rizibukwa mu mateka.”
Iri tangazo ryaje nyuma y’uko Israel ishinjwa kuba yarateye misile kuri radar hafi y’umurwa mukuru wa Iran, Tehran, ibintu byagaragaye nk’ihonyorwa ry’amasezerano y’agahenge yari amaze gutangazwa na Amerika.
Iruhande rw'ibyo, itangazamakuru ryo muri Iran ryatangaje ko mu murwa mukuru, Tehran, humvikanye ibiturika bibiri bikomeye byumvikanye hafi y'umurwa mukuru, Tehran. Nubwo hatatangajwe byinshi kuri ibyo biturika, byakurikiwe n’itangazo rya radiyo ya gisirikare ya Israel rivuga ko hagabwe igitero kuri radar iri hafi y’umurwa mukuru wa Iran.
Ibi byongeye urujijo ku gahenge k' amahoro yari yitezwe, abantu benshi bongera kugira impungenge ko intambara ishobora kubura.
Amahanga nayo ari mu rujijo
Perezida w’u Bufaransa, Emmanuel Macron, uri mu ruzinduko muri Norvège yavuze ko yishimiye itangazwa ry’agahenge ariko anagaragaza impungenge.
Yagize ati: “Icyifuzo cyo guhagarika imirwano ni intambwe ishimishije, ariko ibiri kuba birerekana ko ibintu bitarasobanuka kandi bishobora kongera guturika igihe icyo ari cyo cyose.”
Uburusiya, binyuze ku muvugizi wa Perezida Dmitri Peskov, bwatangaje ko bushimishijwe n’ayo masezerano, buvuga ko “twese dukwiye kwishimira agahenge, tukizera ko kazaramba.”
Ku rundi ruhande ariko, u Bufaransa bwongeye gusaba Iran kwinjira mu biganiro byihuse bijyanye n’ibikorwa bya nikeleyeri n’ibisasu bya misile, bushimangira ko inzira y’amahoro irambye ishoboka gusa binyuze muri dipolomasi.
Kugeza ubu, umwuka mubi n'urunturuntu biracyari byinshi hagati ya Israel na Iran, ndetse icyizere kiracyari haai ko agahenge kakubahizwa, cyane ko hari impungenge ko isaha n'isaha ibintu byakongera kuba bibi.
Gusa ibihugu bikomeye ku Isi nabyo bikomeje gusaba impande zombi gutuza no kugana ibiganiro.
@rfi
kwamamaza