Kiny
Eng
Fr
Impunzi z’Abanye-Congo 105 zaguye mu Burundi kubera imibereho mibi n'urugomo
Uwajeneza Donatha
Jan 7, 2026 - 12:24
Impunzi z’Abanye-Congo 105 zimaze kugwa mu nkambi zo mu Burundi mu byumweru bibiri bishize bitewe n’imibereho mibi irimo kubura aho kuba heza, ubuvuzi n’ibiribwa, nk’uko byatangajwe n’Umuryango uharanira amahoro n’umubano mwiza w’abaturage (CPCC) ku wa 5 Mutarama (01) 2026. Uyu muryango wahamagariye Leta ya RDC n'imiryango mpuzamahanga kugoboka izi mpunzi, igatanga ubutabazi bwihuse.
kwamamaza
Umuryango CPCC uvuga ko izi mpfu zabereye mu nkambi zitandukanye zo mu Burundi, aho impunzi zahunze imirwano yabaye hagati ya AFC/M23 n'ingabo za RDC ( FARDC) iz'Uburundi ndetse na Wazalendo yabaye mu bice birimo ibya Uvira na Fizi.
CPCC ivuga ko kuba izi mpunzi ziba mu mahema adakwiye, kutabona serivisi z’ubuvuzi zihagije no kubura ibiribwa bihagije biri mu byatumye umubare w’abapfa wiyongera mu gihe gito.
Umuyobozi wa CPCC, Ahadi Bya Masu, yatangaje ko ikibazo gikomeye kurushaho kubera n’umutekano muke mu nkambi.
Yagize ati: “Iki kibazo giteye ubwoba. Twabaze impfu zirenga 105 mu nkambi zitandukanye zo mu Burundi, zatewe n’amacumbi adahagije kandi atanoze, kubura ubuvuzi n’ubutabazi butunganijwe. Bamwe mu mpunzi banagabweho ibitero n’abantu bitwaje amacumu n’ibyuma bityaye.”
CPCC yasabye Leta ya Repubulika Iharanira Demokarasi ya Congo n’abafatanyabikorwa mpuzamahanga gutanga ubufasha bufatika kandi burambye mu kurengera ubuzima bw'izi mpunzi. Unagaragaza ko ubutabazi bwihuse bwafasha izi mpunzi kwirinda izindi mpfu n’ibibazo by’umutekano.
Izi mpunzi zahunze imirwano yabereye mu bice bitandukanye bya Kivu y’Amajyepfo, cyane cyane mu turere twa Uvira na Fizi, zikaba ziri mu nkambi za Rugombo, Rumonge na Gatumba, nubwo hari iziherutse kwimurirwa mu yindi nkambi iri kure y'umupaka. Ni mu gihe UNHCR igaragaza ko kuva mu ntangiriro z’Ukuboza (12) 2025, Uburundi bwakiriye impunzi z’Abanye-Congo zirenga ibihumbi 101.
Leta y’iki gihugu yemera ko izi mpunzi zarenze ubushobozi bw’inkambi ziri hafi y’umupaka, bigatuma bigorana kugaburira bose no kubitaho. Ibi byiyongeraho ikibazo cya cholera gikomeje kugaragara mu nkambi kubera umwanda n’isuku nke, cyane ko izi mpunzi zahungiye mu Burundi mu gihe ibyo bice byari bisanzwe byugarijwe n'iki cyorezo kubera amazi make n'isuku nke byavugwaga muri Bujumbura na Cibitoke.
Ku rundi ruhande, ihuriro AFC/M23 ryatangaje ko hari impunzi zagerageje gusubira mu gihugu cyazo ariko Leta y’u Burundi ikazima inzira, bamwe bagakubitwa abandi bagafungwa. Iri huriro risaba ko imipaka ya Gatumba na Vugizo yafungurwa kugira ngo impunzi zibashe gutaha nk'uko abarundi bashatse gusubira iwabo bava muri za Uvira bahawe inzira.
@radio Okapi
kwamamaza