Kiny
Eng
Fr
FC Barcelona yatsindiye Real Madrid iwayo, mu Mukino Mbappe yandikiyemo andi mateka
Uwajeneza Donatha
May 12, 2025 - 00:55
Ikipe ya FC Barcelona yongeye gutsinda Real Madrid mu mukino ukomeye wa El Clasico, umukino wa 35 wa shampiyona ya Espagne, La Liga 2025. Uyu mukino wabaye ku Cyumweru saa 16:15, usiga Barcelona yongereye amahirwe yo kwegukana igikombe cya shampiyona, ndetse na Mbappe yandika amateka mashya muri Real Madrid.
kwamamaza
Ni umukino wa 261 aya makipe yakinaga, ukaba wabereye ku kibuga cya Real Madrid, uba ubwo iyi kipe yari irushwa na Barcelona amanota ane gusa ku rutonde rwa La Liga.
Real Madrid ni yo yafunguye amazamu ku munota wa 5, ku gitego cyinjijwe na Kylian Mbappé kuri penaliti, nyuma y’ikosa ry’umunyezamu wa Barcelona kuri uyu musore. Real Madrid yakomeje gusatira, maze ku munota wa 14 Mbappé atsinda igitego cya kabiri, biturutse ku mupira watakajwe na ba myugariro ba Barça.
Nubwo Real Madrid yari yatangiye neza, Barcelona ntiyacitse intege. Ku munota wa 19, Eric Garcia yatsinze igitego cya mbere cya Barcelona ku mupira wari uvuye muri koruneri ya Dani Olmo.
Real Madrid yari ifite ikibazo cy’abakinnyi bugarira, yatangiye kwibanda ku gukinira inyuma no gucungira ku mipira miremire. Ibi ntibyaje kuyihira kuko ku munota wa 32, Lamine Yamal yatsinze igitego cya kabiri cya Barcelona ku mupira yahawe na Ferran Torres. Hashize iminota ibiri gusa, Raphinha atsinda igitego cya gatatu cya Barça biturutse ku makosa y’aba myugariro ba Real Madrid.
Mbere y’uko igice cya mbere kirangira, ku munota wa 45, Ferran Torres yongeye gufatanya na Raphinha atsinda igitego cya kane cya FC Barcelona, igice cya mbere kirangira ari 4-2.
Mu gice cya kabiri, impande zombi zakoze impinduka, ariko bigabanya umuvuduko w’ ibitego. Real Madrid yabonye igitego cya gatatu gitsinzwe na Kylian Mbappé ku mupira yahawe na Vinícius Júnior. Nubwo aya makipe yakomeje guhinduranya abakinnyi, nta kindi gitego cyongeye kuboneka kugeza umukino urangiye ari 4-3, iminota 90 irangira Barcelona itsinze.
Ibi byatumye FC Barcelona igira amanota 82, irusha Real Madrid amanota 7, kuko yo yagumanye 75 ikaba ku myanya wa kabiri. Mugihe hasigaye imikino itatu ngo La Liga irangire, birasaba Barcelona gutsinda umukino umwe gusa kugira ngo yegukane igikombe cya 2025.
Uyu mukino ni uw’amateka kuri Kylian Mbappé watsinze ibitego bitatu (hat-trick) ku nshuro ye ya mbere muri El Clasico.
@ Shumbusho Darius/ Isango Star-Kigali
kwamamaza