Kiny
Eng
Fr
Abantu 32 bo muri Côte d’Ivoire bakatiwe imyaka 3, abanyamategeko babo bashinjwa ibyaha
Uwajeneza Donatha
Oct 22, 2025 - 09:33
Urukiko rwa Abidjan rwakatiye abantu 32 igifungo cy’imyaka itatu, rubahamije icyaha cyo guteza umudugararo mu baturage nyuma yo kwitabira imyigaragambyo itemewe yabaye ku ya 11 Ukwakira (10). Iyo myigaragambyo yari yateguwe n’ihuriro Front commun rihuza amashyaka atavuga rumwe na Leta — PDCI na PPA-CI.
kwamamaza
Aba bantu bakatiwe mugihe habura iminsi ine gusa hakaba amatora y'umukuru w'igihugu ateganyijwe ku ya 25 Ukwakira (10) 2025. Gusa abakatiwe bose bari bahakanye ibyo baregwa, bavuga ko batawe muri yombi bari bagiye mu mirimo yabo isanzwe hafi y’ahitwa Saint-Jean, i Cocody, aho iyo myigaragambyo yagombaga gutangirira.
Umwe muri bo yagize ati: “Nari mfite rendez-vous kuri Saint-Jean maze ndi kuva mu modoka bahise bamfata!” Ni mu gihe undi yavuze ko yafashwe ajya mu muhango wo gushyingura.
Ubushinjacyaha bwavuze ko abaregwa uko bari 40 bafashwe bari mu bikorwa by’imyigaragambyo itemewe, busaba ko bahanishwa igifungo cy’imyaka itatu. Buvuga ko uburenganzira bwo kugaragaza ibitekerezo butagomba guhinduka akaduruvayo. Urukiko rwahamije icyaha 32 muri bo, rubakatira igifungo cy'imyaka 3, harekurwa abantu umunani gusa.
Icyakora abunganira abakatiwe, barimo Me Roseline Serikpa, bavuze ko bazajurira iki cyemezo kuko abakiliya babo barenganyijwe, cyane ko hari abari bafashwe n' inzego z’umutekano mbere.
Yagize ati:" Kuva mu gitondo kare, inzego z’umutekano zari zafashe aho imyigaragambyo yagombaga kubera. Ndetse ntiyanatangiye. None kuvuga ko abakiriya bacu bari mu myigaragambyo no kubashinja guteza umudugararo ni ibintu bidafite ishingiro.”
Côté d'Ivoire iri mu bihe by’ubushyamirane bwa politiki, kuko mu cyumweru gishize abandi 50 bakatiwe igifungo nk’iki, naho abandi 65 bategereje kugezwa imbere y’urukiko. Minisiteri y’Umutekano yatangaje ko abantu basaga 700 ari bo bamaze gufatwa muri iki gihe cyo kwitegura amatora ategerejwe ku ya 25 Ukwakira (10) 2025.
Abari bahamagaje imyigaragambyo bavugaga ko batizeye ko amatora y'umukuru w'igihugu atazaba mu mucyo kuko batizeye uburyo yateguwemo, ndetse n'ibindi bibazo bya politike byugarije Côte d'Ivoire muri iki gihe.
@rfi
kwamamaza