Kenya: Hari gutegurwa amasengesho yo kurwanya ubutinganyi
Mar 6, 2023 - 12:05
Rachel Ruto, umufasha wa perezida wa Kenya, William Ruto, yatangaje ko mu gihugu hose hagiye gukorwa amasengesho yo kurwanya ubutinganyi. Avuga ko ari igitero cyagabwe ku muryango.
kwamamaza
Madam Rachel Ruto yatangaje ibi mugihe Perezida Ruto aherutse gutangaza ko igihugu kidashobora gushigikira umwanzuro w’urukiko rukuru.
Mu mpera z’ukwezi gushize, uru rukiko rwatangaje umwanzuro wo kubahiriza uburenganzira bw’abatinganyi bwo gushinga amashirahamwe.
Ku cyumweru, madam Rachel Ruto yavuze ko “Ntidukwiye no kugerageza kuvuga ibyerekeye abatinganyi. Iki ni ikiganiro tudakwiye no kuba dufite mu gihugu kubera kubyemera ni nko guta ubuntu bwacu….”
Muri Kenya, Ubutinganyi buracyafatwa nk’icyaha. Icyakora urukiko rukuru rwemeje ko kwima abatinganyi uburenganzira bwo gushinga imiryango ibavugira muri Kenya kwaba ari ukwangiza uburenganzira bwabo bwo gushinga amashirahamwe, nk’uko biri mu itegeko nshinga ry’iki gihugu.
Hagati aho, uwo mwanzuro wamaganiwe kure na Perezida wa Kenya, William Ruto, hamwe n’abayobozi b’amadini n’amatorero yo muri Kenya.
Ubuyobozi bukuru bwa Kenya buvuga ko buzarwanya iki cyemezo cy’uru rukiko, ko ibi bikwiye kuganirwaho n’abanya-Kenya, atari ikibazo cy’inzego z’ubutabera.
kwamamaza