Kiny
Eng
Fr
Israel-Gaza: Misiri yemeye kugeza imfashanyo muri Gaza. Israel isezeranya kutayibangamira.
Uwajeneza Donatha
Oct 19, 2023 - 17:24
Mugihe intambara hagati ya Israel n’umutwe wa Hamas ikomeje, Perezida w'Amerika Joe Biden yageze ku masezerano na Misiri yo gutanga imfashanyo nkeya muri Gaza mu rwego rwo koroshya amakuba ashingiye ku mibereho.
kwamamaza
Mu ruzinduko rwe muri Israel, Perezida Biden yavuze ko Israel ifite uburenganzira bwo kwihorera ku gitero cya Hamas ari nacyo cyabaye imbarutso y'imirwano.
Yavuze ko Israel yahohotewe bikomeye, ariko ayiburira ko yirinda gutwarwa n'umujinya.
Perezida Biden yashyigikiye ibyo Israel yatangaje ko iturika ryabereye ku bitaro byo muri Gaza ku wa kabiri ritatewe n'igitero cy'indege cya Israel nk’uko byashinjwaga iki gihugu.
Palestine ivuga ko rikete yaturikiye ku bitaro bya Al-Ahli Arab byo muri Gaza, yishe abantu 471, ndetse bishinjwa Israel ko ikomeje kwibasira abasivile, ndetse bizamura kurushaho ubushyamirane mu karere.
Gusa Biden yashyigikiye ibivugwa na Israel ko icyo giturika cyishe abantu, bisa nkaho cyatewe na rokete yarashwe nabi n'undi mutwe w’Abanya-Palestine.
Biden yavuze ko ababajwe cyane kandi ko arakajwe cyane n'icyo cyaturitse.
Israel ivuga ko icyo giturika cyatewe na Islamic Jihad, undi mutwe ukorera muri Gaza, gusa uwo mutwe urabihakana.
Nyuma y’uruzinduko rwamaze nibura amasaha 8, Ubwo yasubiraga muri Amerika, Biden yaganiriye kuri telefone na Perezida wa Misiri Abdel Fattah al-Sisi ku mfashanyo igenewe Gaza.
Biden yabwiye itangazamakuru ko Perezida Sisi wa Misiri [Egypt] yemeye gufungura inzira ya Rafah iva muri Misiri yerekeza muri Gaza, kugira ngo amakamyo agera hafi kuri 20 atwaye imfashanyo igenewe imbabare ndetse amaze igihe ahakambitse ayigeze muri Gaza.
Misiri yemeje ko Perezida wayo na Biden bemeranyijwe gutanga imfashanyo kuri Gaza mu buryo burambye.
Biden ntiyatanze ingengabihe ku ifungurwa ry'uwo mupaka, ariko John Kirby, umuvugizi w'ibiro bya Perezida w'Amerika (White House), yavuze ko ibyo bizaba mu minsi iri imbere nyuma yo gusana umuhanda.
Israel ntizatambamira imfashanyo
Biden yavuze ko inkunga ya miliyoni 100 z'amadolari y'Amerika izagenerwa gufasha abasivile b'Abanya-Palestine.
Biravugwa ko Biden arimo gutekereza gusaba inteko ishingamategeko y'Amerika imfashanyo ya miliyari 10 z'amadolari igenewe Israel, bitarenze ku wa gatanu w'iki cyumweru.
Abanya-Palestine bo muri Gaza bacyeneye cyane ibiribwa, amazi, ibikomoka kuri Peteroli, imiti n'ibindi by'ingenzi mu buzima, nyuma yuko Israel ihagaritse ko byinjira muri Gaza kuva mu minsi 10 ishize.
Israel ikomeje kwihorera nyuma yuko umutwe w'intagondwa wa Hamas w'Abanya-Palestine wishe abantu 1 400 mu gitero cyo ku ya 7 y'uku kwezi kw'Ukwakira (10). Ni igitero kitari cyarigeze kibaho mbere ugereranyije n’ibindi uyu mutwe wagabye kuri Israel.
Kugeza ubu, imibare yerekana ko abantu nibura 3 000 bamaze kugwa mu bitero byo kwihorera bya Israel, nkuko bitangazwa n'abategetsi bo mu rwego rw'ubuzima muri Palestine.
Abanya-Palestine barenga miliyoni imwe bataye ingo zabo bahungira imbere muri Gaza [hafi kimwe cya kabiri (1/2) cy'abaturage ba Gaza].
Benjamin Netanyahu; Minisitiri w'intebe wa Israel, yemeje ko Israel itazabuza ko imfashanyo ivuye mu Misiri igera ku baturage b'abasivile mu majyepfo ya Gaza.
Ariko Israel yavuze ko itazemera ko imfashanyo iyo ari yo yose inyuzwa ku butaka bwayo, kugeza ubwo abashimuswe na Hamas bazaba bamaze kurekurwa. Imibare mishya ya Israel igaragaza ko abantu bagera hafi kuri 200 aribo bashimuswe.
kwamamaza