Kiny
Eng
Fr
Rayon Sports yahagaritse Robertinho na Mazimpaka André mu nshingano z'ubutoza
Uwajeneza Donatha
Apr 14, 2025 - 09:47
Ubuyobozi bw’Ikipe ya Rayon Sports bwaharitse abatoza babiri barimo Umutoza Mukuru, Umunya-Brésil Roberto Oliveira Gonçalves do Carmo n’Umutoza w’Abanyezamu, Mazimpaka André, nyuma yo kutitwara neza mu mikino ya shampiyona iyi kipe imaze iminsi ikina.
kwamamaza
Umusaruro mucye w'ikipe ya Rayon Sports ushingirwa ku mikino iheruka gukina, aho mu mikino itanu yatsinzemo umukino umwe, inganya imikino 3, itsindwa umukino umwe, mu manota 15 yabonyemo amanota 6 gusa.
Muri iyi mikino yanganyije na Gasogi united 0:0, itsinda as Kigali 2:1, inganya na APR FC 0:0, inganyije na Marine fc 2:2 , itsindwa na Mukura Victory 1:0.
Uyu musaruro niwo ubuyobozi bwa Rayon Sports bwashingiyeho buhagarika Robertinho wari umutoza mukuru na Mazimpaka André, umutoza w'abazamu bombi.
Ubu bivuze ko ikipe irakomezanya na Rwaka Claude uherutse kugirwa Umutoza Wungirije, avuye mu Ikipe y’Abagore. Akaba agiye kuyitoza mu mikino isigaye ya shampiyona ndetse n'igikombe cy'Amahoro.
Biteganyijwe ko ku wa kabiri, ku italiki ya 15 Mata (04) 2025, aribwo hazakinwa imikino ya 1/2 y'igikombe cy'Amahoro, aho Rayon Sports izakina na Mukura Victory Sports mu mukino uzabera mu karere ka Huye.
Rayon Sports igiye gukina na Mukura victory sports nyuma y'icyumweru abakinnyi badakora imyitozo kubera ikibazo cy'umushahara w'amezi abiri batakaga ko batarawuhembwa. Bavuga ko baheruka umushahara muri Gashyantare (02).
Nyuma yo gukina imikino y'igikombe cy'Amahoro, Rayon Sports izagaruka ikina na Etincelles FC muri shampiyona. Mu mukino ubanza, Rayon Sports yari yayitsinze igitego 1:0. Ubu iri ku mwanya wa kabiri n'amanota 47 , inyuma ya APR FC iri ku mwanya wa mbere n'amanota 48.
@ Darius Shumbusho/Isango Star-Kigali
kwamamaza