Kiny
Eng
Fr
Issa Hayatou wayoboye CAF yitabye Imana
Uwajeneza Donatha
Aug 9, 2024 - 08:01
Kuri uyu wa 8 Kanama (08) 2024, nibwo Umunya-Cameroon Issa Hayatou wayoboye Impuzamashyirahamwe y’Umupira w’Amaguru muri Afurika yitabye Imana . Uyu mugabo waguye mu Bufaransa yaburaga amasaha macye ngo yuzuze imyaka 78.
kwamamaza
Nyuma yo gusakara kw’iyi nkuru y’incamugongo, ikinyamakuru Jeune Afrique cyatangaje ko umuntu wo mu muryango w’uyu mukambwe baganiriye yagitangarije ko yazize indwara y’umutima, aho yararwariye mu bitaro bya American Hospital mu Mujyi wa Paris mu Bufaransa, mu gace ka Neuilly-Sur-Seine, ari naho yari amaze amezi avurirwa inshuro nyinshi.
Issa Hayatou yayoboye impuzamashyirahamwe y’Umupira w’Amaguru muri Afurika imyaka 29, hagati ya 1987 kugeza mu mwaka wa 2017. Ashimirwa byinshi ariko akanitwa umunyagitugu mu buyobozi bwe kuko akenshi bivugwa ko akenshi yikizaga ababaga batumva ibintu kimwe nawe.
Mu mwaka wa 2002, yagerageje kwiyamamariza kuyobora FIFA ariko atsindwa n’Umusuwisi Sepp Blatter ku mwanya wo kuyobora iyi Mpuzamashyirahamwe ya Ruhago ku Isi yabereye Visi Perezida hagati y’i 1992 kugeza 2017.
Iyi Mpuzamashyirahamwe yayiboye hagati y’Ukwakira (10) 2015 na Werurwe (03) 2016 nyuma yo guhagarikwa k’uyu musuwisi wari wamutsinze muri 2002.
@Gakunzi Blaise/Isango Star
kwamamaza